ذبحني المكيف, وانا بدوري ذبحت المدام.

ما يقدر الواحد يقعد بدون مكيف, وفي هالأيام ترقد والمكيف حار الا شوي, اذا جا وقت الفجر صار بقدرة قادر بارد. وإذا طلعت الشمس صارت حرارة الغرفة لا تطاق. وحرارة جسمي مثل الزنبرك مرة طالعة ومرة نازلة.مرة المدام تشتكي من شدة البرودة(وأنا أقول لها تصبري لأن زوجك جلده جلد ضب ما يحس) ومرة أنا أقطر من العرق.

في هالوقت الجو متقلب, خلال الأسبوع الماضي كان الجو بارد في الرياض بشكل ملفت للنظر, وهالأيام حار جداً.

والضحية في صراع الطبيعة مع المكيف أنا العبد الضعيف, إن نمت بدون مكيف(وهذا مالا أطيق) ذبحني الحر وسبحت بعرقي, وإن شغلت المكيف على أقل درجة مريت على فصول السنة كلها بين حر وبرد وخريف, وصحيت من النوم وأنا إلى الزكام أقرب.

إلين صرت الآن مزكم رسمي وأكتب هالكلمات وأنا أكح بين لحظة والثانية وأحس صدري يتقطع من داخل.

أدائي في العمل صار بطيء, تركيزي قل, يصعب علي الكلام.

مشكلتي مع المكيف ان دفع الهواء عالي, وان حطيته على أقل درجة الكومبرسر ما يشتغل, والدرجة الثانية دفع الهواء قوي جداً بشكل مزعج. هو مكيف جيد بس ما ينفع إلا في عز الصيف.

هالمكيف من نوع LG Turbo وندمت على شراءه, شركة LG من أسوأ شركات التكييف اللي تعاملت معها على الإطلاق. سواءً وحدات التكيف السبلت ولا الشباك.

اليوم العصر نمت بدون مكيف, وما أحس الوضع تحسن. وأعتقد اني راح أضطر أنام بدون مكيف خلال هالاسبوع إلين تستتب الحالة الصحية.

ياشين الزكام في الحر, في البرد شوي مقبول, وعادي الواحد ينام بدون مكيف, بس في الحر معاناة.

ما اقول إلا جعلكم ما تذوقون اللي ذقته.

وادعوا لي.